مستونگ میں لکپاس کے قریب کسٹمز کے گودام میں لگنے والی آگ پر 22 گھنٹے گزرنے کے باوجود مکمل قابو نہیں پایا جا سکا جبکہ امدادی کارروائیاں تاحال جاری ہیں۔
ڈپٹی کمشنر مستونگ کے مطابق آگ گزشتہ روز صبح 10 بجے لگی تھی جس پر قابو پانے کے لیے 10 سے زائد فائر بریگیڈ گاڑیاں مسلسل کام کر رہی ہیں۔
حکام کے مطابق گودام میں ایل پی جی سلینڈر، ایندھن، کیمیکل، خشک میوہ جات، کپڑے اور ٹائرز موجود تھے جس کے باعث آگ پر قابو پانے میں شدید مشکلات پیش آ رہی ہیں۔
انتظامیہ کا کہنا ہے کہ آگ لگنے کے بعد ایل پی جی باؤزر اور گیس سلینڈرز میں متعدد دھماکے بھی ہوئے جبکہ واقعے میں 35 افراد جھلس کر زخمی ہوئے جنہیں اسپتال منتقل کر دیا گیا ہے۔
ڈی سی کے مطابق گودام میں آگ کے باعث 100 سے زائد گاڑیاں بھی جل گئیں تاہم آگ کی شدت کم ہونے کے بعد کوئٹہ، کراچی شاہراہ پر ٹریفک بحال کر دی گئی ہے۔