وادی کمراٹ میں شدید بارش کے باعث ندی نالوں میں طغیانی آگئی جبکہ دریائے کوہستان میں پانی کی سطح بھی بلند ہوگئی، جس سے علاقے میں سیلابی صورتحال پیدا ہوگئی۔
موسلادھار بارش کے باعث کمراٹ روڈ پر مختلف مقامات پر لینڈ سلائیڈنگ کے واقعات پیش آئے، جس کے نتیجے میں سڑک ہر قسم کی ٹریفک کے لیے بند ہوگئی۔ سڑک بند ہونے سے گاڑیوں کی لمبی قطاریں لگ گئیں جبکہ متعدد سیاح مختلف مقامات پر پھنس گئے۔
مقامی شہریوں نے اپنی مدد آپ کے تحت امدادی سرگرمیاں شروع کردیں اور متاثرہ سڑک کو بحال کرنے کے لیے کام جاری ہے تاکہ ٹریفک کی روانی بحال کی جاسکے۔
دوسری جانب علاقے میں ہونے والی موسلادھار بارش کے بعد موسم خوشگوار ہوگیا اور گرمی کی شدت میں واضح کمی ریکارڈ کی گئی۔