جمعیت علمائے اسلام کے سربراہ مولانا فضل الرحمان کی اپیل پر 22 مئی بروز جمعہ کو ملک گیر یومِ احتجاج منایا جائے گا۔
ترجمان جے یو آئی اسلم غوری کے مطابق ملک میں جاری مہنگائی اور بدامنی کے خلاف تمام صوبائی اور ضلعی ہیڈ کوارٹرز پر بھرپور احتجاجی مظاہرے کیے جائیں گے۔
ترجمان نے عوام سے مظاہروں میں بھرپور شرکت کی اپیل کرتے ہوئے جے یو آئی کی تمام صوبائی اور ضلعی تنظیموں کو عوامی شرکت کے ساتھ میدان میں نکلنے کی ہدایت کی ہے۔
اسلم غوری کا کہنا ہے کہ ملک میں بدامنی اور مہنگائی نے عوام کو خودکشیوں پر مجبور کردیا ہے، جبکہ عوام کے نام پر اسمبلیوں میں بیٹھنے والے حکمرانوں کو ان کی کوئی فکر نہیں اور وہ اپنے اخراجات کم کرنے کی بجائے سارا بوجھ عوام پر ڈالے ہوئے ہیں۔
جے یو آئی میڈیا سیل کے مطابق ترجمان کا مزید کہنا تھا کہ جے یو آئی نے ہمیشہ عوام کی مشکلات میں اپنا کردار ادا کیا ہے اور وہ قوم کی اس مشکل گھڑی میں بھی عوام کے شانہ بشانہ میدانِ عمل میں موجود ہے۔