وزیراعظم شہباز شریف نے عیدالاضحیٰ کے موقع پر قوم اور امت مسلمہ کو مبارکباد دیتے ہوئے کہا ہے کہ اعلیٰ مقصد کے لیے جان، خواہشات اور مفادات قربان کرنا ایمان کی معراج ہے۔
اپنے پیغام میں وزیراعظم نے کہا کہ عیدالاضحیٰ سنت ابراہیمیؑ، قربانی، ایثار اور اطاعتِ خداوندی کا درس دیتی ہے۔ انہوں نے کہا کہ قربانی کا جذبہ انسانیت، ذمہ داری اور دوسروں کے لیے ایثار کا احساس پیدا کرتا ہے۔
شہباز شریف نے دہشتگردی کے خلاف جانوں کا نذرانہ پیش کرنے والے شہدا کو قومی فخر قرار دیتے ہوئے عوام پر زور دیا کہ عید کے موقع پر غریبوں، مستحقوں اور نادار افراد کا خصوصی خیال رکھا جائے۔
دوسری جانب صدر مملکت آصف علی زرداری نے بھی قوم اور امت مسلمہ کو عیدالاضحیٰ کی مبارکباد دیتے ہوئے کہا کہ عید قربانی صبر، اخلاص، وفا اور انسانیت کی خدمت کا درس دیتی ہے۔
صدر زرداری نے کہا کہ اصل کامیابی مال و دولت میں نہیں بلکہ تقویٰ، خلوص اور انسانیت کی خدمت میں ہے، جبکہ قومی زندگی میں برداشت، دیانت داری اور باہمی احترام کو فروغ دینا ضروری ہے۔