میئر کراچی مرتضیٰ وہاب نے کہا ہے کہ عیدالاضحیٰ کے موقع پر شہر میں صفائی اور انتظامات کراچی انتظامیہ کے لیے بڑا چیلنج ہوتے ہیں، جس کے لیے تمام بلدیاتی ادارے پانچ دن تک متحرک رہتے ہیں۔
پولو گراؤنڈ میں نماز عیدالاضحیٰ کے بعد میڈیا سے گفتگو کرتے ہوئے انہوں نے شہریوں کو عید کی مبارکباد دی۔
مرتضیٰ وہاب نے کہا کہ شہر میں تین مقامات پر آلائشوں کو ٹھکانے لگانے کے انتظامات کیے گئے ہیں جبکہ گزشتہ سال 98 ٹن آلائشیں ٹھکانے لگائی گئی تھیں اور اس سال اس سے بھی زیادہ مقدار کی توقع ہے۔
انہوں نے کہا کہ آلائشوں کو ٹھکانے لگانا سالڈ ویسٹ مینجمنٹ بورڈ کی ذمہ داری ہے، جبکہ شہریوں سے اپیل ہے کہ اگر کہیں سے آلائش نہ اٹھائی جائے تو 1128 ہیلپ لائن پر شکایت درج کرائیں۔