وفاقی وزیر داخلہ محسن نقوی نے سعودی وزیر داخلہ شہزادہ عبدالعزیز بن سعود سے ملاقات کی، جس میں دوطرفہ تعلقات، داخلی سیکیورٹی اور باہمی تعاون کے مختلف امور پر تفصیلی تبادلہ خیال کیا گیا۔
ملاقات کے دوران دونوں رہنماؤں نے ایک دوسرے کو عیدالاضحیٰ کی مبارکباد دی اور نیک خواہشات کا اظہار کیا۔ سعودی وزیر داخلہ نے محسن نقوی کو حج کی سعادت حاصل کرنے پر بھی مبارکباد پیش کی۔
ذرائع کے مطابق گفتگو میں پاکستان اور سعودی عرب کے درمیان سیکیورٹی تعاون کو مزید فروغ دینے پر اتفاق کیا گیا۔ اس موقع پر فیصلہ کیا گیا کہ فیڈرل کانسٹیبلری کے اسپیشل ڈپلومیٹک پروٹیکشن یونٹ کے 200 اہلکاروں کو سعودی عرب میں تربیت فراہم کی جائے گی۔
ملاقات میں یہ بھی طے پایا کہ سعودی وزارت داخلہ کا ایک اعلیٰ سطحی وفد جلد پاکستان کا دورہ کرے گا تاکہ دوطرفہ تعاون کو مزید وسعت دی جا سکے۔
وفاقی وزیر داخلہ محسن نقوی نے حج کے دوران سعودی حکومت کے بہترین انتظامات کو سراہا۔ دونوں وزرائے داخلہ نے خطے کی موجودہ صورتحال پر بھی تبادلہ خیال کیا، جبکہ سعودی وزیر داخلہ نے کشیدگی میں کمی کے لیے پاکستان کے مثبت کردار کو سراہا۔