ملک کے بیشتر علاقوں میں شدید گرمی کی لہر برقرار رہنے کا امکان ہے جبکہ بعض شہروں میں بارش کی پیشگوئی بھی کی گئی ہے۔
محکمہ موسمیات کے مطابق پنجاب کے بیشتر اضلاع میں موسم شدید گرم رہے گا، تاہم لاہور، حافظ آباد، شیخوپورہ، گوجرانوالہ، گجرات، سیالکوٹ، نارووال اور گردونواح میں چند مقامات پر تیز ہواؤں اور گرج چمک کے ساتھ بارش متوقع ہے۔
اسلام آباد اور اس کے مضافاتی علاقوں میں دن کے اوقات میں شدید گرمی رہے گی، جبکہ رات کے وقت مختلف مقامات پر بارش اور تیز ہواؤں کا امکان ظاہر کیا گیا ہے۔
خیبرپختونخوا کے بیشتر اضلاع میں موسم گرم اور خشک رہنے کی توقع ہے، جبکہ زیریں علاقوں میں شدید گرمی پڑنے کا امکان ہے۔ محکمہ موسمیات کے مطابق چترال، دیر، سوات، ایبٹ آباد، کوہاٹ، پشاور اور مالاکنڈ کے چند مقامات پر بارش ہو سکتی ہے۔
دوسری جانب سندھ کے بیشتر اضلاع میں شدید گرمی کی لہر برقرار رہنے کی پیشگوئی کی گئی ہے، جبکہ بلوچستان کے بیشتر علاقوں میں موسم گرم اور خشک رہے گا۔