بیورو آف امیگریشن اینڈ اوورسیز ایمپلائمنٹ نے اعلان کیا ہے کہ بیرونِ ملک مقیم پاکستانیوں کی جائیدادوں کے تحفظ کے لیے ”قانون برائے تحفظ املاک اوورسیز پاکستانی 2024ء“ نافذ کردیا گیا ہے۔
اعلامیے کے مطابق نئے قانون کے تحت ملک بھر میں خصوصی عدالتیں قائم کی جائیں گی جو جائیدادوں سے متعلق تنازعات اور غیر قانونی قبضوں کے مقدمات کو ترجیحی بنیادوں پر نمٹائیں گی۔
بیورو کے مطابق اس قانون کا مقصد اوورسیز پاکستانیوں کو ان کی جائیدادوں کے مکمل قانونی حقوق فراہم کرنا اور ان کے کیسز کے لیے تیز رفتار اور مؤثر عدالتی نظام تشکیل دینا ہے۔
حکام نے کہا ہے کہ اس اقدام سے بیرونِ ملک مقیم پاکستانیوں کے اعتماد میں اضافہ ہوگا اور ان کے اثاثوں کا بہتر تحفظ یقینی بنایا جاسکے گا۔