وفاقی وزیر بحری امور جنید انوار چوہدری نے کراچی پورٹ کے قریب پیش آنے والے بحری حادثے سے متعلق وضاحت جاری کرتے ہوئے کہا ہے کہ واقعہ بندرگاہ کی حدود سے باہر پیش آیا۔
انہوں نے بتایا کہ دو غیر ملکی بحری جہازوں کے درمیان ہونے والے حادثے میں کسی قسم کے جانی نقصان یا زخمی ہونے کی اطلاع نہیں ملی۔
وفاقی وزیر کے مطابق 28 مئی کی شب پیش آنے والا یہ واقعہ دونوں جہازوں کے ماسٹرز کی غفلت کے باعث رونما ہوا، جس کی مکمل رپورٹ طلب کرلی گئی ہے۔
انہوں نے کہا کہ متاثرہ کیبل بچھانے والے جہاز کو کراچی پورٹ ٹرسٹ (کے پی ٹی) کے ٹگس کی مدد سے بحفاظت بندرگاہ منتقل کردیا گیا ہے جبکہ واقعے کی وجوہات جاننے کے لیے تحقیقات جاری ہیں۔
جنید انوار چوہدری نے بندرگاہ پر بروقت ردعمل اور مؤثر انتظامات پر عملے کو خراجِ تحسین پیش کرتے ہوئے کہا کہ حکومت اور متعلقہ ادارے بحری سلامتی کے لیے مکمل طور پر متحرک ہیں۔
چیئرمین کراچی پورٹ کے مطابق بندرگاہ پر بحری سرگرمیاں معمول کے مطابق جاری ہیں۔ ایڈمرل شاہد احمد نے بتایا کہ متاثرہ جہاز کو ہر ممکن تکنیکی اور آپریشنل معاونت فراہم کی گئی ہے۔