عیدالاضحیٰ کی تعطیلات کے دوران وادی کاغان میں سیاحوں کی غیر معمولی آمد ریکارڈ کی گئی، جہاں تین روز میں ایک لاکھ 28 ہزار سے زائد افراد نے سیاحت کے لیے رخ کیا۔
خیبر پختونخوا کلچر اینڈ ٹورازم اتھارٹی کے مطابق تعطیلات کے دوران مجموعی طور پر 1 لاکھ 28 ہزار 862 سیاح وادی کاغان پہنچے، جن میں غیر ملکی سیاح بھی شامل تھے۔
سیاح وادی کے دلکش مناظر، برف پوش پہاڑوں، جھیلوں، آبشاروں اور دریائے کنہار کے خوبصورت نظاروں سے لطف اندوز ہوتے رہے۔
انتظامیہ کے مطابق سیاحوں کی رہنمائی اور سہولت کے لیے مختلف مقامات پر خصوصی عملہ تعینات کیا گیا تھا، جبکہ بڑھتی ہوئی آمد سے علاقے میں سیاحتی سرگرمیوں میں نمایاں اضافہ دیکھنے میں آیا۔