اسلام آباد کے علاقے بہارہ کہو میں اٹھا چوک کے قریب پیش آنے والے ایک افسوسناک ٹریفک حادثے میں 4 افراد جاں بحق اور 4 زخمی ہوگئے۔
اسپتال ذرائع کے مطابق جاں بحق ہونے والوں میں محمد فضل اور عامر شامل ہیں، جبکہ دیگر دو افراد کی شناخت تاحال نہیں ہوسکی۔ زخمیوں کو فوری طبی امداد کے لیے قریبی اسپتال منتقل کردیا گیا ہے۔
حادثے کے بعد گاڑی کا ڈرائیور موقع سے فرار ہوگیا۔ اطلاع ملتے ہی ریسکیو اور پولیس ٹیمیں جائے وقوعہ پر پہنچ گئیں اور امدادی کارروائیاں شروع کر دیں۔
پولیس نے حادثے میں ملوث گاڑی کو تحویل میں لے لیا ہے، جبکہ فرار ہونے والے ڈرائیور کی گرفتاری کے لیے تلاش جاری ہے۔ حکام کا کہنا ہے کہ واقعے کی مزید تحقیقات کی جا رہی ہیں۔