محکمہ موسمیات نے ملک میں بارشوں کے نئے سلسلے کی پیشگوئی کرتے ہوئے آئندہ چند روز کے دوران مختلف علاقوں میں بارش کی توقع ظاہر کی ہے، جس کے باعث درجہ حرارت میں کمی آنے کا امکان ہے۔
ڈائریکٹر محکمہ موسمیات عرفان ورک کے مطابق 2 جون سے ہواؤں کا ایک نیا سلسلہ ملک میں داخل ہوگا، جس کے زیر اثر مختلف علاقوں میں دو سے تین روز تک بارشیں متوقع ہیں۔
انہوں نے بتایا کہ بارشوں کے نتیجے میں گرمی کی شدت میں عارضی کمی آئے گی اور درجہ حرارت میں کچھ حد تک کمی ریکارڈ کی جا سکتی ہے۔ تاہم جون کے دوران ملک کے مختلف علاقوں میں درجہ حرارت میں اضافے کا امکان برقرار رہے گا۔
عرفان ورک نے خبردار کیا کہ ماہ جون کے آخری ہفتوں میں شدید ہیٹ ویو کی صورتحال بھی پیدا ہوسکتی ہے، جس کے پیش نظر شہریوں کو احتیاطی تدابیر اختیار کرنے کی ضرورت ہوگی۔
محکمہ موسمیات کے مطابق بارشوں کے اس نئے سلسلے سے بعض علاقوں میں موسم خوشگوار ہونے کی توقع ہے، جبکہ متعلقہ اداروں کو بھی موسمی صورتحال پر نظر رکھنے کی ہدایت کی گئی ہے۔