محکمہ موسمیات نے ملک کے مختلف حصوں میں آئندہ 24 گھنٹوں کے دوران بارشوں کی پیشگوئی کرتے ہوئے کہا ہے کہ ایک نیا موسمی سلسلہ آج سے ملک میں داخل ہونے کا امکان ہے جس کے باعث آئندہ دو سے تین روز تک مختلف علاقوں میں وقفے وقفے سے بارشیں متوقع ہیں۔
محکمہ موسمیات کے مطابق وفاقی دارالحکومت اسلام آباد میں دن کے وقت موسم گرم رہے گا تاہم شام کے اوقات میں مطلع جزوی ابر آلود رہنے اور بارش کا امکان ہے۔
خیبر پختونخوا کے مختلف علاقوں بشمول بٹگرام، ایبٹ آباد، کالام، سوات، مالاکنڈ، بنوں اور کوہاٹ میں کہیں کہیں بارش کی پیشگوئی کی گئی ہے۔
پنجاب کے متعدد شہروں بہاولپور، خانپور، رحیم یار خان، ڈی جی خان، راجن پور، سرگودھا، اٹک، لاہور، راولپنڈی، سیالکوٹ، گوجرانوالہ، نارووال اور فیصل آباد میں بھی بارش کا امکان ظاہر کیا گیا ہے، جبکہ مری اور گلیات میں بھی بارش متوقع ہے۔
محکمہ موسمیات کے مطابق سندھ کے بیشتر اضلاع میں موسم شدید گرم اور خشک رہے گا تاہم بعض جنوبی علاقوں میں جزوی بارش کا امکان ہے۔ بلوچستان کے جنوبی حصوں میں بھی گرمی کی شدت برقرار رہے گی البتہ نصیرآباد، کوہلو، بارکھان، موسیٰ خیل اور خضدار میں چند مقامات پر بارش ہو سکتی ہے۔
ڈائریکٹر محکمہ موسمیات عرفان ورک نے بتایا ہے کہ 2 جون سے ملک میں بارشوں کا نیا سلسلہ داخل ہوگا جس کے زیر اثر مختلف علاقوں میں دو سے تین روز تک وقفے وقفے سے بارشیں جاری رہنے کا امکان ہے۔