سرکاری حج اسکیم کے تحت رواں سال ایک لاکھ 19 ہزار 210 پاکستانی عازمین نے فریضۂ حج ادا کیا، جبکہ مجموعی طور پر حج آپریشن پر 139 ارب 16 کروڑ روپے خرچ ہوئے۔
رپورٹ کے مطابق سرکاری حج اسکیم کے تحت 77 ہزار 743 عازمین نے 40 سے 45 روزہ طویل حج پروگرام کا انتخاب کیا۔ مجموعی حاجیوں میں لانگ حج پروگرام سے استفادہ کرنے والوں کا تناسب 65.2 فیصد رہا، جبکہ ہر حاجی نے اس پروگرام کے لیے اوسطاً 11 لاکھ 50 ہزار روپے ادا کیے۔
دوسری جانب 41 ہزار 467 عازمین نے 20 سے 22 روزہ مختصر حج پروگرام کے تحت فریضۂ حج ادا کیا۔ شارٹ حج پروگرام کا انتخاب کرنے والے عازمین کا تناسب 34.8 فیصد رہا اور ہر حاجی نے اوسطاً 12 لاکھ روپے خرچ کیے۔
اعداد و شمار کے مطابق سرکاری حج اسکیم کے تحت 50 ہزار 114 خواتین نے فریضۂ حج ادا کیا، جو مجموعی سرکاری حج کوٹے کا 43.5 فیصد بنتا ہے۔ جبکہ 65 ہزار 182 مرد عازمین نے حج کی سعادت حاصل کی، جن کا تناسب 56.5 فیصد ریکارڈ کیا گیا۔
رپورٹ میں بتایا گیا ہے کہ رواں سال حج آپریشن کے دوران عازمین کو سفری، رہائشی اور دیگر سہولیات کی فراہمی کے لیے وسیع انتظامات کیے گئے، جن پر مجموعی طور پر 139 ارب روپے سے زائد اخراجات آئے۔