چیئرمین سینیٹ سید یوسف رضا گیلانی نے ایوان کو آگاہ کیا ہے کہ کفایت شعاری مہم کے نتیجے میں سینیٹ نے ایک ارب 43 کروڑ 60 لاکھ روپے کی بچت کرکے قومی خزانے میں واپس جمع کرا دیے ہیں۔
سینیٹ اجلاس کے دوران بچت کی تفصیلات پیش کرتے ہوئے چیئرمین سینیٹ نے بتایا کہ مالی سال 2025-26 میں سینیٹ نے اپنے مجموعی بجٹ کا 15.9 فیصد بچایا، جو وزارتِ خزانہ کی جانب سے مقرر کردہ ہدف سے 500 فیصد زیادہ ہے۔ ان کا کہنا تھا کہ کفایت شعاری مہم کا آغاز انہوں نے اپنے دفتر سے کیا اور تمام شعبوں میں غیر ضروری اخراجات کم کرنے پر توجہ دی گئی۔
سید یوسف رضا گیلانی کے مطابق سینیٹ فنانس کمیٹی کے 18 میں سے 17 ترقیاتی اور خریداری منصوبے مؤخر کیے گئے، جس کے باعث کروڑوں روپے کی بچت ممکن ہوئی۔ انہوں نے مزید بتایا کہ بھرتیوں، انتظامی اور آپریشنل اخراجات میں نمایاں کمی کے ذریعے مالی نظم و ضبط کو فروغ دیا گیا۔
چیئرمین سینیٹ نے کہا کہ سرکاری گاڑیوں کی خریداری کے لیے مختص 6 کروڑ روپے بھی خرچ نہیں کیے گئے اور موجودہ مالی سال کے دوران سینیٹ نے ایک بھی نئی سرکاری گاڑی نہیں خریدی، جو حکومتی کفایت شعاری پالیسی پر عمل درآمد کی واضح مثال ہے۔