مری ایکسپریس وے پر گاڑی میں آتشزدگی کے نتیجے میں 10 مسافروں کے جاں بحق ہونے کے افسوسناک واقعے کا مقدمہ درج کر لیا گیا ہے۔ پولیس نے واقعے میں ڈرائیور کے خلاف قتل بالسبب، تیز رفتاری اور غفلت سے گاڑی چلانے سمیت مختلف دفعات شامل کی ہیں۔
موٹر وے پولیس کے ایک انسپکٹر کی مدعیت میں درج ایف آئی آر کے مطابق حادثہ مبینہ طور پر ڈرائیور کی لاپرواہی اور تیز رفتاری کے باعث پیش آیا۔ گاڑی بے قابو ہو کر پھسلتے ہوئے نالے میں جا گری، جہاں حفاظتی دیوار میں پھنسنے کے باعث دروازے نہ کھل سکے۔
ایف آئی آر میں بتایا گیا ہے کہ نالے میں گرنے کے بعد گاڑی میں اچانک آگ بھڑک اٹھی، جس کے باعث مسافر بروقت باہر نہ نکل سکے اور 10 افراد جھلس کر جاں بحق ہو گئے جن میں 5 بچے بھی شامل ہیں۔
پولیس کے مطابق حادثے میں 7 بچوں سمیت 16 مسافر زخمی ہوئے جنہیں قریبی اسپتال منتقل کر دیا گیا ہے۔واقعے کے بعد ڈرائیور موقع سے فرار ہو گیا، جس کی گرفتاری کے لیے چھاپے مارے جا رہے ہیں جبکہ حادثے کی مختلف پہلوؤں سے تحقیقات جاری ہیں۔