متحدہ عرب امارات کے قونصل جنرل ڈاکٹر بخیت عتیق نے شہر میں جاری شدید گرمی کی لہر کے پیش نظر کارکنوں کے تحفظ کے لیے خصوصی اقدامات کرنے کی ہدایت جاری کر دی ہے۔
ایک بیان میں ڈاکٹر بخیت عتیق نے کہا کہ شدید گرمی کے دوران کارکنوں کی صحت اور حفاظت کو یقینی بنانے کے لیے دوپہر 12:30 بجے سے سہ پہر 3 بجے تک کام معطل رکھا جائے۔
انہوں نے ہدایت کی کہ کارکنوں کو سایہ دار آرام گاہیں، پینے کے صاف پانی اور دیگر ضروری سہولیات فراہم کی جائیں تاکہ وہ ہیٹ ویو کے منفی اثرات سے محفوظ رہ سکیں۔
قونصل جنرل کا کہنا تھا کہ شدید موسمی حالات میں کارکنوں کا تحفظ صرف ایک انتظامی ضرورت نہیں بلکہ انسانی اور اخلاقی ذمہ داری بھی ہے جسے ہر صورت یقینی بنایا جانا چاہیے۔
انہوں نے متعلقہ اداروں اور کمپنیوں پر زور دیا کہ وہ گرمی کی شدت کے دوران حفاظتی اقدامات پر سختی سے عمل درآمد کریں تاکہ کارکنوں کی صحت اور جانوں کا تحفظ ممکن بنایا جا سکے۔