بلوچستان کے دارالحکومت کوئٹہ میں سول اسپتال کی خاتون ڈاکٹر پر تیزاب گردی کے واقعے کے خلاف ینگ ڈاکٹرز ایسوسی ایشن کی ہڑتال ایک ہفتے سے جاری ہے، جس کے باعث سرکاری اسپتالوں میں طبی خدمات شدید متاثر ہو رہی ہیں۔
ینگ ڈاکٹرز کی ہڑتال کے نتیجے میں سرکاری اسپتالوں کی او پی ڈیز اور ہنگامی طبی سروسز بند ہیں، جس سے مریضوں کو شدید مشکلات کا سامنا ہے۔
ینگ ڈاکٹرز ایسوسی ایشن نے مطالبہ کیا ہے کہ سول اسپتال میں خاتون ڈاکٹر ماہ نور پر تیزاب پھینکنے کے واقعے کی شفاف تحقیقات کی جائیں اور ملزمان کو جلد از جلد قانون کے کٹہرے میں لایا جائے۔
تنظیم کے رہنماؤں کا کہنا ہے کہ سرکاری اسپتالوں میں ڈاکٹروں اور طبی عملے کی سیکیورٹی کے لیے مؤثر اور عملی اقدامات کیے جائیں تاکہ مستقبل میں ایسے افسوسناک واقعات کا تدارک کیا جا سکے۔
واضح رہے کہ چند روز قبل کوئٹہ کے سول اسپتال میں خاتون ڈاکٹر ماہ نور پر تیزاب پھینکنے کا واقعہ پیش آیا تھا، جس کے خلاف ینگ ڈاکٹرز کی احتجاجی ہڑتال جاری ہے۔