وفاقی دارالحکومت اسلام آباد اور راولپنڈی کے مختلف علاقوں میں ہونے والی بارش کے بعد موسم خوشگوار ہو گیا اور گرمی کی شدت میں نمایاں کمی ریکارڈ کی گئی۔
شہر کے مختلف حصوں میں دوپہر کے وقت سیاہ بادل چھائے رہے جبکہ کہیں ہلکی اور کہیں تیز بارش ہوئی، جس سے شہریوں نے گرمی سے وقتی نجات حاصل کی۔ محکمہ موسمیات کے مطابق مارگلہ پہاڑیوں پر ایک فعال موسمی نظام موجود ہے، جس کے باعث جڑواں شہروں میں آج مزید بارش کا امکان برقرار ہے۔
محکمہ موسمیات نے پیشگوئی کی ہے کہ آج رات خیبر پختونخوا، کشمیر، جنوبی پنجاب، بالائی سندھ اور شمال مشرقی بلوچستان کے مختلف علاقوں میں تیز ہواؤں اور گرج چمک کے ساتھ بارش متوقع ہے، جبکہ بعض مقامات پر ژالہ باری کا بھی امکان ہے۔
محکمہ موسمیات کے مطابق شمال مشرقی بلوچستان اور جنوبی پنجاب کے چند علاقوں میں موسلادھار بارش بھی ہو سکتی ہے، تاہم ملک کے بیشتر دیگر علاقوں میں موسم گرم اور خشک رہنے کی توقع ہے۔
دوسری جانب ملک میں سب سے زیادہ درجہ حرارت بلوچستان کے شہر دالبندین میں 46 ڈگری سینٹی گریڈ ریکارڈ کیا گیا۔ سبی میں درجہ حرارت 45 ڈگری جبکہ لاڑکانہ میں 44 ڈگری سینٹی گریڈ ریکارڈ کیا گیا۔