خیبر پختونخوا کا آئندہ مالی سال 27-2026 کا بجٹ آج دوپہر دو بجے صوبائی اسمبلی میں پیش کیا جائے گا۔پاکستان تحریک انصاف (پی ٹی آئی) کے صوبائی سیکرٹری اطلاعات شوکت علی یوسفزئی نے کہا ہے کہ آئندہ مالی سال کا صوبائی بجٹ نہ تو متوازن ہوگا اور نہ ہی سرپلس، بلکہ اسے تقریباً 50 ارب روپے کے خسارے کا سامنا ہوگا۔
سوشل میڈیا پر جاری اپنے بیان میں شوکت علی یوسفزئی نے بتایا کہ بجٹ میں عوام پر کوئی نیا ٹیکس عائد نہیں کیا جا رہا جبکہ بجٹ کی تیاری حقیقی آمدن اور دستیاب مالی وسائل کو مدنظر رکھتے ہوئے کی گئی ہے۔
انہوں نے کہا کہ صوبائی حکومت نے مالی معاملات میں ذمہ دارانہ حکمت عملی اختیار کی ہے اور بجٹ کی تیاری کا کریڈٹ وزیراعلیٰ خیبرپختونخوا سہیل خان آفریدی اور مشیر خزانہ مزمل اسلم کو جاتا ہے جنہوں نے موجودہ مالی حالات کے مطابق بجٹ مرتب کیا۔