کراچی میں ٹرانسپورٹرز کی ہڑتال تیسرے روز بھی جاری ہے جس کے باعث شہریوں کو ایک بار پھر شدید سفری مشکلات کا سامنا ہے۔
کراچی ٹرانسپورٹ اتحاد کی جانب سے ای چالان اور بھاری جرمانوں کے خلاف پہیہ جام ہڑتال جاری ہے، تاہم سندھ حکومت کی جانب سے ہڑتال ختم کرانے کے لیے تاحال کوئی مؤثر اقدامات سامنے نہیں آئے۔
ہڑتال کے باعث شہری، خصوصاً مزدور طبقہ اور ملازمت پیشہ افراد، اپنی روزمرہ سرگرمیوں کے لیے پیدل سفر کرنے پر مجبور ہیں۔ اسپتالوں، بالخصوص سول اور جناح اسپتال آنے والے مریضوں اور ان کے اہل خانہ کو بھی شدید مشکلات کا سامنا ہے۔
دوسری جانب شہر میں ٹرانسپورٹ بند ہونے کے باعث آن لائن ٹرانسپورٹ سروسز پر دباؤ بڑھ گیا ہے، جس کے نتیجے میں چنگچی رکشہ اور آن لائن کرایوں میں اضافہ دیکھنے میں آ رہا ہے۔