فیصل آباد کے علاقے سول لائن میں مبینہ طور پر زہریلا کھانا کھانے سے دو کمسن بہن بھائی جاں بحق جبکہ والدین سمیت خاندان کے چار افراد کی حالت غیر ہونے پر انہیں اسپتال منتقل کر دیا گیا۔
اہل خانہ کے مطابق زاہد قادری کے گھرانے نے رات کے کھانے میں دال کھائی جس کے کچھ ہی دیر بعد تمام افراد کی طبیعت اچانک خراب ہو گئی۔ متاثرین کو فوری طور پر الائیڈ اسپتال منتقل کیا گیا جہاں انہیں طبی امداد فراہم کی جا رہی ہے۔
اسپتال ذرائع کے مطابق واقعے میں دو کمسن بہن بھائی، بتول فاطمہ اور منیر، جانبر نہ ہو سکے جبکہ زیرِ علاج ایک بچے کی حالت بدستور تشویشناک بتائی جا رہی ہے۔
پولیس اور متعلقہ حکام نے واقعے کی تحقیقات شروع کر دی ہیں۔ جاں بحق بچوں کی لاشوں کا پوسٹ مارٹم کر کے نمونے لیبارٹری بھجوا دیے گئے ہیں تاکہ اموات کی حتمی وجہ کا تعین کیا جا سکے۔
حکام کا کہنا ہے کہ فرانزک اور لیبارٹری رپورٹس موصول ہونے کے بعد واقعے کی اصل وجوہات سامنے آئیں گی جبکہ تمام پہلوؤں سے تحقیقات جاری ہیں۔