موسم گرما کی تعطیلات کے دوران ملک بھر سے بڑی تعداد میں سیاحوں نے وادی کاغان کا رخ کر لیا، جس کے باعث علاقے میں سیاحتی سرگرمیوں میں نمایاں اضافہ دیکھنے میں آ رہا ہے۔
خیبر پختونخوا کلچر اینڈ ٹورازم اتھارٹی کے مطابق گزشتہ روز ایک لاکھ 9 ہزار سے زائد سیاح وادی کاغان پہنچے، جن میں 30 غیر ملکی سیاح بھی شامل تھے۔
اعداد و شمار کے مطابق وادی کاغان صوبے میں سب سے زیادہ توجہ حاصل کرنے والی سیاحتی منزل رہی، جبکہ رات گئے تک سیاحوں کی آمد کا سلسلہ جاری رہا۔
سیاحوں کی بڑھتی ہوئی تعداد کے پیش نظر کاغان ڈویلپمنٹ اتھارٹی کا عملہ مختلف مقامات پر تعینات ہے، جو سیاحوں کو سہولیات اور رہنمائی فراہم کر رہا ہے۔
کے ڈی اے انتظامیہ نے سیاحوں سے اپیل کی ہے کہ وہ دریائے کنہار اور دیگر ندی نالوں کے قریب جانے سے گریز کریں اور وادی کے قدرتی حسن کے تحفظ کے لیے صفائی کا خاص خیال رکھتے ہوئے ذمہ دارانہ سیاحت کا مظاہرہ کریں۔