وفاقی وزیر داخلہ محسن نقوی کی ہدایت پر بیرونِ ملک مقیم پاکستانیوں کو پاسپورٹ گھر کی دہلیز تک پہنچانے کے نظام کو مزید مؤثر، تیز اور محفوظ بنانے کا فیصلہ کر لیا گیا۔
اس سلسلے میں ڈی جی امیگریشن اینڈ پاسپورٹس چوہدری محمد علی رندھاوا کی زیرصدارت اعلیٰ سطحی اجلاس منعقد ہوا، جس میں نادرا، نیشنل بینک آف پاکستان (این بی پی) اور ڈی ایچ ایل کے نمائندوں نے شرکت کی۔
اجلاس میں اوورسیز پاکستانیوں کے لیے پاسپورٹ ہوم ڈلیوری سروس کو مزید آسان، تیز اور قابلِ اعتماد بنانے سے متعلق مختلف تجاویز کا جائزہ لیا گیا۔ شرکاء نے پاسپورٹ کی گھر تک فراہمی کے طریقہ کار کو حتمی شکل دینے پر اتفاق کیا۔
اجلاس میں فیصلہ کیا گیا کہ اوورسیز پاکستانیوں کو بہتر سہولیات کی فراہمی کے لیے متعلقہ اداروں کے درمیان باہمی تعاون کو مزید فروغ دیا جائے گا، جبکہ پاسپورٹس کی بروقت، محفوظ اور مؤثر ہوم ڈلیوری یقینی بنانے کے لیے عملی اقدامات بھی تیز کیے جائیں گے۔