کراچی پریس کلب کے سامنے شہید برہان مظفر وانی کی دسویں برسی کے موقع پر ایک عظیم الشان کشمیر یکجہتی ریلی کا انعقاد کیا گیا، جس میں پاکستان مسلم لیگ فنکشنل کراچی ڈویژن کے چھ اضلاع کے عہدیداروں اور کارکنان کی بڑی تعداد نے شرکت کی۔
ریلی کے شرکاء سے خطاب کرتے ہوئے مسلم لیگ فنکشنل سندھ کے سیکریٹری جنرل سردار عبدالرحیم نے کہا کہ کشمیری عوام نے آزادی اور حقِ خودارادیت کے لیے بے مثال قربانیاں دی ہیں جنہیں تاریخ ہمیشہ یاد رکھے گی۔ انہوں نے واضح کیا کہ پاکستان کا ہر شہری مظلوم کشمیریوں کے ساتھ کھڑا ہے اور ان کی اخلاقی، سیاسی اور سفارتی حمایت جاری رکھے گا۔
سردار عبدالرحیم نے عالمی برادری پر زور دیا کہ وہ کشمیر میں انسانی حقوق کی خلاف ورزیوں کا نوٹس لے کر اقوام متحدہ کی قراردادوں کے مطابق کشمیریوں کو ان کا حق دلائے۔ انہوں نے عزم ظاہر کیا کہ شہید برہان وانی اور دیگر شہداء کی قربانیاں رائیگاں نہیں جائیں گی اور کشمیر کے مسئلے پر قومی اتحاد وقت کی اہم ضرورت ہے۔ آخر میں انہوں نے ریلی میں عوام اور کارکنان کی بھرپور شرکت پر ان کا شکریہ ادا کیا۔