آئندہ سال سرکاری حج اسکیم کے تحت حج پیکجز مہنگے ہونے کا امکان ہے جبکہ مختصر حج پیکج کی متوقع قیمت تقریباً 13 لاکھ روپے مقرر کیے جانے کی تجویز زیر غور ہے۔
ذرائع وزارت مذہبی امور کے مطابق آئندہ سال سرکاری حج اسکیم کے تحت عازمین حج کو گزشتہ برس کے مقابلے میں زیادہ اخراجات برداشت کرنا پڑ سکتے ہیں اور مختصر حج پیکج کی قیمت میں تقریباً ایک لاکھ روپے تک اضافے کا امکان ہے۔
ذرائع کا کہنا ہے کہ مختصر حج پیکج کا دورانیہ 20 سے 22 روز پر مشتمل ہوگا جبکہ 40 روزہ لانگ حج پیکج بھی تقریباً 50 ہزار روپے مہنگا ہونے کی توقع ہے۔ لانگ حج پیکج کی متوقع قیمت تقریباً 12 لاکھ روپے رکھی جا سکتی ہے۔
ذرائع کے مطابق عازمین کو حج اخراجات دو اقساط میں جمع کرانے کی سہولت فراہم کیے جانے کا امکان ہے جس کے تحت تقریباً 6،6 لاکھ روپے کی دو مساوی اقساط میں ادائیگی کی جا سکے گی۔
واضح رہے کہ گزشتہ سال سرکاری حج اسکیم کے تحت مختصر حج پیکج کی قیمت تقریباً 12 لاکھ روپے جبکہ لانگ حج پیکج کی لاگت تقریباً ساڑھے 11 لاکھ روپے تھی۔