وفاقی وزیر دفاع خواجہ آصف نے جمعیت علمائے اسلام (ف) کے سربراہ مولانا فضل الرحمان کے حالیہ بیان پر سخت ردعمل دیتے ہوئے اسے پاکستان کے شہداء کی قربانیوں کی توہین قرار دیا ہے۔
سماجی رابطے کی ویب سائٹ ایکس پر اپنے بیان میں خواجہ آصف نے کہا کہ مولانا فضل الرحمان ایک سینئر سیاستدان اور ممتاز مذہبی رہنما ہیں، اس لیے انہیں الفاظ کے انتخاب میں زیادہ احتیاط کا مظاہرہ کرنا چاہیے تھا۔
وزیر دفاع نے کہا کہ فوجیوں کی قربانیوں کو ان کی تنخواہوں سے جوڑنا نہ صرف غیرمنصفانہ ہے بلکہ اس سے شہداء کے اہلِ خانہ کی دل آزاری بھی ہوئی ہے۔ ان کا کہنا تھا کہ کوئی بھی سپاہی صرف تنخواہ کے لیے اپنی جان کا نذرانہ پیش نہیں کرتا، بلکہ وہ فرض، یقین اور وطن سے محبت کے جذبے کے تحت قربانی دیتا ہے۔
خواجہ آصف نے مزید کہا کہ سیاسی اختلاف رائے ہر ایک کا حق ہے، تاہم دہشت گردی کے خلاف لڑنے والے سکیورٹی اہلکاروں اور شہریوں کی قربانیوں کو کم تر دکھانا اخلاقی طور پر نامناسب رویہ ہے۔