پاکستان ٹیلی کمیونیکیشن اتھارٹی نے صارفین کی اجازت کے بغیر شناختی کارڈز پر سمیں جاری کرنے اور سم اجرا کے قواعد و ضوابط کی خلاف ورزی پر ملک کی چاروں موبائل فون کمپنیوں پر مجموعی طور پر 74 کروڑ روپے کے جرمانے عائد کر دیے۔
پی ٹی اے کے مطابق زونگ پر سم اجرا کے قواعد کی خلاف ورزی پر 15 کروڑ 56 لاکھ روپے، جاز پر غیرقانونی سموں کے اجرا اور نگرانی میں غفلت برتنے پر 11 کروڑ 67 لاکھ روپے جبکہ ٹیلی نار پر سم اجرا کے ضوابط کی خلاف ورزی پر 11 کروڑ 67 لاکھ روپے کا جرمانہ عائد کیا گیا ہے۔
اسی طرح یوفون پر مختلف نوعیت کی خلاف ورزیوں کے باعث مجموعی طور پر 23 کروڑ 34 لاکھ روپے سے زائد کا جرمانہ عائد کیا گیا۔
پی ٹی اے نے اپنے فیصلوں میں قرار دیا کہ موبائل کمپنیوں نے سموں کے اجرا کے عمل میں سنگین بے ضابطگیوں کا مظاہرہ کیا اور فرنچائزز کے ذریعے ہونے والی خلاف ورزیوں کی ذمہ داری بھی متعلقہ کمپنیوں پر عائد ہوتی ہے۔ اتھارٹی کے مطابق کمپنیوں نے فرنچائزز اور بائیومیٹرک تصدیقی نظام کی مؤثر نگرانی نہیں کی۔
پی ٹی اے نے تمام موبائل کمپنیوں کو مقررہ مدت کے اندر جرمانے جمع کرانے کی ہدایت کرتے ہوئے خبردار کیا ہے کہ عدم ادائیگی کی صورت میں مزید قانونی کارروائی عمل میں لائی جائے گی۔
اتھارٹی کا کہنا ہے کہ غیرقانونی طور پر سموں کا اجرا شناختی چوری، سائبر فراڈ اور مالیاتی جرائم جیسے سنگین مسائل کو جنم دے سکتا ہے، اس لیے ایسے اقدامات کے خلاف سخت کارروائی جاری رکھی جائے گی۔