پاکستان پیپلز پارٹی کے چیئرمین بلاول بھٹو زرداری نے آزاد کشمیر کے علاقے ڈڈیال میں انتخابی جلسے سے خطاب کرتے ہوئے کہا ہے کہ سیاست کا مقصد اقتدار نہیں بلکہ عوام کے مسائل کا حل ہے۔ انہوں نے آزاد کشمیر کے آئندہ انتخابات کو ریاست کے مستقبل کے لیے اہم قرار دیتے ہوئے عوام سے 27 جولائی کو بھرپور انداز میں ووٹ ڈالنے کی اپیل کی۔
بلاول بھٹو نے کہا کہ پیپلز پارٹی کشمیر کے عوام کے مسائل سے واقف ہے، جنہیں طویل احتجاج یا شٹر ڈاؤن کے بجائے پرامن سیاسی مذاکرات اور مجوزہ 'ٹروتھ اینڈ ری کنسیلی ایشن کمیشن' کے ذریعے حل کیا جا سکتا ہے۔ انہوں نے مودی سرکار پر تنقید کرتے ہوئے عزم ظاہر کیا کہ پیپلز پارٹی بھارتی حکومت کو کشمیریوں کی زمینوں پر قبضے کے عزائم میں کامیاب نہیں ہونے دے گی۔
چیئرمین پیپلز پارٹی نے سندھ میں سیلاب متاثرین کے لیے 20 لاکھ مکانات کی تعمیر کو اپنی عوام دوست پالیسیوں کا ثبوت قرار دیتے ہوئے کہا کہ ان کی جماعت ہمیشہ غریب طبقے کے حقوق کی علمبردار رہی ہے۔ انہوں نے امید ظاہر کی کہ گلگت بلتستان کی طرح آزاد کشمیر کے عوام بھی پیپلز پارٹی کے منشور پر اعتماد کرتے ہوئے 'تیر' کے نشان پر مہر لگائیں گے۔