اسلام آباد کی انسدادِ دہشت گردی عدالت نے پاکستان تحریک انصاف کے رہنماؤں کے خلاف 26 نومبر کے احتجاج، سنگجانی جلسے، سپریم کورٹ کے باہر احتجاج اور دیگر مقدمات میں دائر 230 سے زائد عبوری ضمانت کی درخواستوں میں توسیع کرتے ہوئے متعلقہ رہنماؤں کو 29 اکتوبر تک گرفتار نہ کرنے کا حکم دے دیا۔
انسدادِ دہشت گردی عدالت کے جج ابوالحسنات محمد ذوالقرنین نے مقدمات کی سماعت کی، جس میں پی ٹی آئی کے رہنما جنید اکبر، رؤف حسن، عبدالقیوم نیازی اور دیگر عدالت میں پیش ہوئے۔
سماعت کے دوران عدالت نے تمام عبوری ضمانتوں میں توسیع کرتے ہوئے قانون نافذ کرنے والے اداروں کو ہدایت کی کہ متعلقہ رہنماؤں کو آئندہ سماعت، یعنی 29 اکتوبر تک گرفتار نہ کیا جائے۔
عدالت نے فریقین کو آئندہ سماعت پر اپنے تفصیلی دلائل پیش کرنے کی بھی ہدایت کی۔
واضح رہے کہ پی ٹی آئی رہنماؤں کے خلاف تھانہ ترنول، رمنا، آبپارہ، سیکریٹریٹ اور دیگر تھانوں میں احتجاج اور دیگر الزامات کے تحت متعدد مقدمات درج ہیں۔