کابینہ ڈویژن نے اپریل سے جون تک کی مدت کے دوران موصول ہونے والے توشہ خانہ کے تحائف کا باضابطہ ریکارڈ جاری کردیا ہے، جس کے مطابق وزیراعظم اور نائب وزیراعظم سمیت مختلف اعلیٰ حکومتی شخصیات کو مجموعی طور پر 21 قیمتی تحائف موصول ہوئے۔
ریکارڈ کے مطابق تحائف حاصل کرنے والوں میں وزیراعظم شہباز شریف اور نائب وزیراعظم شامل ہیں۔
وزیراعظم کو ملنے والے تحائف میں ایک شوگر باؤل، قیمتی قلم، مسجد نبویﷺ کا ماڈل، شیلڈ، ٹائی، چینی خلائی اسٹیشن کا ماڈل، ایک کپ اور گھڑی شامل ہیں۔ دوسری جانب نائب وزیراعظم کو چمڑے کی چینی بیلٹ، مصری مجسمے کا ماڈل اور کف لنکس بطور تحفہ ملے۔
کابینہ ڈویژن کے مطابق دونوں اعلیٰ ترین حکومتی شخصیات نے موصول ہونے والے تمام تحائف توشہ خانہ میں جمع کرا دیے ہیں اور فی الوقت ان کی مالی مالیت کا تخمینہ لگانے کا عمل جاری ہے۔