بلوچستان کے ضلع مستونگ میں سیکیورٹی فورسز نے انٹیلی جنس بیسڈ آپریشن کے دوران چار دہشت گردوں کو ہلاک کر دیا، جبکہ بڑی مقدار میں اسلحہ، گولہ بارود اور دہشت گردوں کے زیرِ استعمال موٹر سائیکلیں بھی قبضے میں لے لی گئیں۔
سیکیورٹی ذرائع کے مطابق یہ کارروائی ضلع مستونگ کے علاقے کھڈ کوچہ میں آپریشن العزم کے تحت کی گئی، جہاں خفیہ اطلاعات کی بنیاد پر دہشت گردوں کے خلاف مؤثر کارروائی عمل میں لائی گئی۔ ذرائع کا کہنا ہے کہ ہلاک ہونے والے دہشت گردوں کا تعلق فتنہ الہندوستان سے تھا۔
ذرائع کے مطابق کارروائی کے دوران متعدد دہشت گرد زخمی بھی ہوئے، جبکہ دہشت گردوں کی سہولت کاری میں ملوث کئی مشتبہ افراد کو گرفتار کرلیا گیا ہے۔
سیکیورٹی ذرائع کا کہنا ہے کہ آپریشن کے بعد علاقے میں سرچ اور کلیئرنس آپریشن جاری ہے اور سیکیورٹی فورسز نے علاقے کا مکمل کنٹرول سنبھال رکھا ہے تاکہ کسی بھی ممکنہ خطرے سے مؤثر انداز میں نمٹا جاسکے۔
ذرائع کے مطابق مستونگ کے علاقے کھڈ کوچہ میں حالیہ دہشت گرد کارروائیوں کے بعد سیکیورٹی فورسز نے انٹیلی جنس بیسڈ آپریشنز میں مزید تیزی لائی ہے۔ سیکیورٹی ذرائع کا کہنا ہے کہ دہشت گردی کے مکمل خاتمے اور بلوچستان میں پائیدار امن کے قیام تک دہشت گرد عناصر کے خلاف کارروائیاں بلا تعطل جاری رہیں گی۔