پنجاب یونیورسٹی کے ملازمین کو لے جانے والی بس بالاکوٹ کے قریب حادثے کا شکار ہوگئی، جس کے نتیجے میں 16 افراد زخمی ہوگئے۔
ترجمان پنجاب یونیورسٹی کے مطابق یونیورسٹی ملازمین سیر و تفریح کے لیے ناران اور کاغان گئے ہوئے تھے۔ واپسی کے دوران بالاکوٹ کے قریب بس سامنے سے آنے والی گاڑی کو بچانے کی کوشش میں بے قابو ہو کر کھائی میں جا گری۔
ڈرائیور کا کہنا ہے کہ سڑک پر پھسلن ہونے کے باعث بس اس کے قابو سے باہر ہو گئی، جس کے باعث حادثہ پیش آیا۔
حادثے کے فوری بعد مقامی افراد اور ریسکیو ٹیمیں موقع پر پہنچ گئیں اور زخمیوں کو نکال کر قریبی اسپتال منتقل کیا گیا، جہاں انہیں طبی امداد فراہم کی جا رہی ہے۔
واقعے کے بعد انتظامیہ نے حادثے کی وجوہات جاننے کے لیے تحقیقات شروع کردی ہیں۔