سیکیورٹی فورسز نے بلوچستان میں دہشت گردی کے خلاف انٹیلی جنس بیسڈ ”آپریشن العزم“ کے تحت مختلف علاقوں میں مؤثر کارروائیاں کرتے ہوئے متعدد دہشت گردوں کو ہلاک اور ان کے ٹھکانے تباہ کر دیے۔
سیکیورٹی ذرائع کے مطابق کلی کند عمرانی، کھڈکوچہ، مستونگ اور بلوچستان کے دیگر علاقوں میں کیے گئے آپریشنز کے دوران فتنہ الہندوستان سے تعلق رکھنے والے دہشت گردوں کو بھاری نقصان پہنچایا گیا۔ کارروائیوں کے دوران دہشت گردوں کے متعدد ٹھکانے اور کمین گاہیں تباہ کر دی گئیں، جبکہ وہاں سے بڑی مقدار میں اسلحہ اور دھماکا خیز مواد بھی برآمد کیا گیا۔
ذرائع کا کہنا ہے کہ آپریشن العزم کے دوران اب تک فتنہ الہندوستان کے 16 دہشت گرد ہلاک کیے جاچکے ہیں۔
سیکیورٹی ذرائع نے اس عزم کا اعادہ کیا ہے کہ بلوچستان سے دہشت گردی کے مکمل خاتمے اور پائیدار امن کے قیام تک سیکیورٹی فورسز کی کارروائیاں بلا تعطل جاری رہیں گی۔