چیئرمین پاکستان پیپلز پارٹی بلاول بھٹو زرداری نے مسلم لیگ (ن) کے صدر میاں نواز شریف کے بیان پر ردعمل دیتے ہوئے کہا ہے کہ کشمیر ہو یا کشمور، میرپور ہو یا میرپور خاص، ان شہروں کے صرف نام ہی نہیں بلکہ مزاج بھی ایک جیسا ہے۔
اپنے ویڈیو بیان میں بلاول بھٹو زرداری نے کہا کہ کشمیر ہو یا کشمور، وہاں کے عوام اپنے حقِ حاکمیت اور حقِ ملکیت پر کسی کو سیاسی ڈاکا ڈالنے کی اجازت نہیں دیں گے۔
انہوں نے کہا کہ میاں نواز شریف برا نہ مانیں، گزشتہ انتخابات میں کشمیر اور کشمور کے عوام نے مسلم لیگ (ن) کو مسترد کیا تھا۔ ان کا دعویٰ تھا کہ جس طرح میرپور خاص کے عوام نے پیپلز پارٹی کا ساتھ دیا، اسی طرح میرپور کے عوام بھی آئندہ انتخابات میں تیر کے انتخابی نشان کو کامیاب بنائیں گے۔
چیئرمین پیپلز پارٹی نے اپنے بیان میں آزاد جموں و کشمیر کے عوام سے پارٹی امیدواروں کی حمایت کی اپیل بھی کی۔