وفاقی وزیر پیٹرولیم علی پرویز ملک نے کہا ہے کہ عوام کے لیے جلد اچھی خبر متوقع ہے، کیونکہ پیٹرولیم مصنوعات کی قیمتوں میں کمی کا امکان ہے۔
میڈیا سے گفتگو کرتے ہوئے وفاقی وزیر نے بتایا کہ آئل ٹینکرز ایسوسی ایشن کے ساتھ ہونے والی ملاقات مثبت رہی، جس میں مختلف امور پر اتفاق رائے پایا گیا۔
انہوں نے کہا کہ معاملات کے مؤثر حل اور آئندہ کی حکمت عملی مرتب کرنے کے لیے اسپیشل سیکرٹری کی سربراہی میں ایک کمیٹی بھی تشکیل دے دی گئی ہے، جو متعلقہ فریقین سے مشاورت کے بعد اپنی سفارشات پیش کرے گی۔
علی پرویز ملک کا کہنا تھا کہ حکومت عوام کو زیادہ سے زیادہ ریلیف فراہم کرنے کے لیے اقدامات کر رہی ہے، اور پیٹرولیم مصنوعات کی قیمتوں میں ممکنہ کمی بھی اسی سلسلے کی ایک کڑی ہے۔