امریکی صدر ڈونلڈ ٹرمپ نے کہا ہے کہ امریکا کے پاس بڑے پیمانے پر اسلحہ اور گولہ بارود کے وافر ذخائر موجود ہیں جبکہ مزید اسلحہ تیزی سے تیار اور ضرورت کے مطابق حاصل بھی کیا جا رہا ہے۔
اپنے بیان میں ٹرمپ نے کہا کہ دفاعی کمپنیاں ریکارڈ تعداد میں نئے پلانٹس اور فیکٹریاں قائم کر رہی ہیں۔ انہوں نے خبردار کیا کہ غداری پر مبنی معلومات لیک کرنے والوں کا سراغ لگا کر انہیں سخت اور طویل سزائیں دی جائیں گی۔
ٹرمپ کا یہ بیان ایسے وقت میں سامنے آیا ہے جب امریکی اخبار واشنگٹن پوسٹ نے دعویٰ کیا تھا کہ ایران جنگ کے دوران اسلحے کی قلت کے باعث صدر ٹرمپ نے وزیر دفاع پیٹ ہیگستھ سے وضاحت طلب کی تھی۔ تاہم امریکی حکام نے اس دعوے کی تردید کرتے ہوئے کہا ہے کہ امریکا کو اسلحے کے ذخائر کی کوئی کمی درپیش نہیں۔