متحدہ عرب امارات میں مقیم پاکستانی شہریوں کے لیے نیشنل ڈیٹابیس اینڈ رجسٹریشن اتھارٹی (نادرا) نے خصوصی موبائل رجسٹریشن سروس کا آغاز کر دیا ہے، جس کے تحت شناختی دستاویزات سے متعلق مختلف سہولیات ان کی دہلیز کے قریب فراہم کی جائیں گی۔
نادرا کے اعلامیے کے مطابق ادارے کی موبائل رجسٹریشن ٹیم، پاکستان قونصلیٹ کے تعاون سے یو اے ای کے مختلف علاقوں کا دورہ کر رہی ہے تاکہ پاکستانی شہریوں کو شناختی دستاویزات کی فراہمی اور تجدید کی سہولت مہیا کی جاسکے۔
اعلامیے کے مطابق نادرا کی موبائل رجسٹریشن ٹیم 8 اگست کو مقامی وقت کے مطابق صبح 8 بجے سے شام 4 بجے تک الاسماء ٹرانسپورٹ اینڈ کمپنی، الہیل روڈ، فجیرہ میں خصوصی کیمپ قائم کرے گی۔
کیمپ کے دوران پاکستانی شہریوں کو نائیکوپ کے اجرا، تجدید، ترمیم، ری پرنٹ، منسوخی اور فیملی رجسٹریشن سرٹیفکیٹ (FRC) کے اجرا سمیت مختلف رجسٹریشن خدمات فراہم کی جائیں گی۔ نادرا نے متعلقہ افراد سے مقررہ وقت پر کیمپ سے رجوع کرنے کی اپیل کی ہے۔