بانی پاکستان قائداعظم محمد علی جناح کا 78واں یوم وفات آج منایا جا رہا ہے۔ وزیراعظم شہباز شریف نے اپنے پیغام میں کہا ہے کہ پاکستان کو ترقی یافتہ اور فلاحی ریاست بنانا قائداعظم کی سیاسی میراث کا اولین مقصد ہے۔
وزیراعظم نے کہا کہ قائداعظم نے بصیرت افروز قیادت اور مدبرانہ سیاسی حکمت عملی سے برصغیر کے مسلمانوں کے لیے آزاد مملکت کی راہ ہموار کی۔ انہوں نے قیام پاکستان کے بعد نوزائیدہ ریاست کو درپیش انتظامی اور مالیاتی مسائل سمیت لاکھوں افراد کی نقل مکانی اور نظام حکومت چلانے جیسے چیلنجز کا بھی سامنا کیا۔
شہباز شریف کا کہنا تھا کہ پاکستان کی ترقی، خوشحالی اور عوامی فلاح پوری قوم کی مشترکہ کوششوں سے ممکن ہے، قوم کو قائداعظم کے اصولوں ایمان، اتحاد اور نظم و ضبط پر کاربند رہنے کا عہد کرنا چاہیے۔
دوسری جانب گورنر سندھ نہال ہاشمی اور وزیراعلیٰ سندھ مراد علی شاہ نے مزار قائد پر حاضری دی، پھول چڑھائے، فاتحہ خوانی کی اور مہمانوں کی کتاب میں تاثرات درج کیے۔
گورنر سندھ نے کہا کہ قائداعظم کی انتھک محنت سے پاکستان معرض وجود میں آیا، ان کے اصول ہمارے لیے مشعل راہ ہیں۔ وزیراعلیٰ سندھ نے کہا کہ قائداعظم نے بیماری کے باوجود قیام پاکستان کے لیے شبانہ روز محنت کی، ملک کی ترقی کے لیے ایمان، اتحاد اور تنظیم کے اصولوں پر عمل کرنا ہوگا۔