متحدہ قومی موومنٹ پاکستان کے رہنما اور وفاقی وزیر مصطفیٰ کمال نے کہا ہے کہ نئے انتظامی یونٹس کا قیام ملک کی بقا کے لیے ناگزیر ہے اور انتظامی بنیادوں پر نئے صوبے بنانا وقت کی اہم ضرورت ہے۔
کورنگی میں ایم کیو ایم کی رابطہ مہم سے خطاب کرتے ہوئے مصطفیٰ کمال نے کہا کہ 6 ہفتے بعد شارع فیصل پر ہر زبان بولنے والا اپنے انتظامی یونٹ کے مطالبے کے لیے نکلے گا۔
انہوں نے کہا کہ سندھ کے حکمران شہریوں کے حقوق تسلیم کرنے کو تیار نہیں جعلی ڈومیسائل بنا کر کراچی کے نوجوانوں کا حق مارا جا رہا ہے۔
مصطفیٰ کمال نے کہا کہ گزشتہ 18 برس کے دوران سندھ کو 22 ہزار ارب روپے ملے لیکن اس کے باوجود پڑھے لکھے نوجوانوں کو ایک چپڑاسی کی نوکری تک نہیں دی گئی۔
انہوں نے مزید کہا کہ اس رقم سے کئی مرتبہ نیا سندھ بنایا جاسکتا تھا تاہم ان کے بقول سندھ کے حکمرانوں نے یہ پیسہ بیرونِ ملک جائیدادیں بنانے پر خرچ کیا۔