وزیراعظم شہباز شریف نے امیر جماعت اسلامی حافظ نعیم الرحمان سے ٹیلیفونک رابطہ کرکے پیٹرولیم لیوی کے خلاف جاری لانگ مارچ چند روز کے لیے مؤخر کرنے کی درخواست کی ہے۔
ترجمان جماعت اسلامی کے مطابق وزیراعظم نے کہا کہ وطن واپسی پر جماعت اسلامی سے پیٹرولیم لیوی کے معاملے پر نتیجہ خیز بات چیت اور عوام کے لیے بہتر ریلیف پیکیج پر گفتگو کریں گے۔
حافظ نعیم الرحمان نے کہا کہ جماعت اسلامی حکومت سے تصادم یا امن و امان کا مسئلہ نہیں چاہتی، تاہم وہ عوام کے حق کے لیے احتجاج کر رہے ہیں۔ مارچ مؤخر کرنے کی درخواست پر جماعت اسلامی کی شوریٰ سے مشاورت کے بعد فیصلہ کیا جائے گا۔
جماعت اسلامی کا پیٹرولیم لیوی کے خلاف سپر ٹرین لانگ مارچ کراچی سے ملتان پہنچ چکا ہے جبکہ وزیراعظم شہباز شریف اقوام متحدہ کی جنرل اسمبلی کے اجلاس میں شرکت کے لیے نیویارک میں موجود ہیں۔