پریذیڈنٹ ٹرافی گریڈ ون فرسٹ کلاس ٹورنامنٹ کے تیسرے راؤنڈ کے پہلے دن پی ٹی وی کے بلے باز محمد شہزاد نے پاکستان کی کرکٹ تاریخ کی تیز ترین فرسٹ کلاس سنچری اسکور کرنے کا نیا ریکارڈ قائم کردیا۔
ڈائمنڈ کرکٹ گراؤنڈ اسلام آباد میں کنگز مین اکیڈمی کے خلاف کھیلے جا رہے میچ میں شہزاد نے محض 49 گیندوں پر اپنی سنچری مکمل کی۔
اس سے قبل پاکستان کی جانب سے تیز ترین فرسٹ کلاس سنچری کا ریکارڈ مصباح الحق کے پاس تھا جنہوں نے آسٹریلیا کے خلاف 56 گیندوں پر سنچری بنائی تھی۔
محمد شہزاد نے مجموعی طور پر 62 گیندوں کا سامنا کرتے ہوئے 12 چوکوں اور 8 چھکوں کی مدد سے 114 رنز کی شاندار اننگز کھیلی۔ یہ ان کے فرسٹ کلاس کیریئر کی چھٹی سنچری تھی جبکہ فرسٹ کلاس کرکٹ کی عالمگیر تاریخ میں یہ آٹھویں تیز ترین سنچری شمار کی گئی ہے۔