پاکستان تحریکِ انصاف کے 27 ستمبر کو اسلام آباد کی جانب مجوزہ مارچ کے پیش نظر خیبرپختونخوا کو وفاقی دارالحکومت سے ملانے والی اہم شاہراہوں پر آمدورفت بند کر دی گئی۔
ٹریفک حکام کے مطابق ایم ون موٹروے کو اسلام آباد ٹول پلازہ سے چھچھ انٹرچینج تک دونوں اطراف سے بند کر دیا گیا ہے، جبکہ جی ٹی روڈ کو بھی اٹک خورد کے مقام پر ٹریفک کے لیے بند کردیا گیا ہے۔
حکام کے مطابق دونوں مقامات پر سکیورٹی انتظامات کے تحت پولیس اہلکار تعینات کر دیے گئے ہیں، جبکہ شاہراہوں کی بندش کا فیصلہ پی ٹی آئی کے مجوزہ احتجاج اور مارچ کے تناظر میں کیا گیا ہے۔
ٹریفک حکام کا کہنا ہے کہ مذکورہ سڑکیں اگلے احکامات تک بند رہیں گی۔
شاہراہوں کی بندش کے باعث خیبرپختونخوا اور اسلام آباد کے درمیان سفر کرنے والے شہریوں کو متبادل راستے اختیار کرنا پڑسکتے ہیں۔