پاکستان نے مدینہ منورہ میں طیبہ پاور ڈسٹری بیوشن اسٹیشن پر حوثی ملیشیا کے حملے کی شدید مذمت کرتے ہوئے سعودی عرب کے ساتھ مکمل یکجہتی کا اظہار کیا ہے۔
ترجمان دفتر خارجہ کے مطابق 29 ستمبر کو مسجد نبوی ﷺ کو بجلی فراہم کرنے والے انفرا اسٹرکچر کو نشانہ بنانا سنگین اشتعال انگیزی ہے، جس پر دنیا بھر کے کروڑوں مسلمانوں میں تشویش پائی جاتی ہے۔
پاکستان نے حرمین شریفین، نمازیوں اور زائرین کی سلامتی یقینی بنانے پر زور دیتے ہوئے خطے میں امن و سلامتی کے لیے خطرہ بننے والی غیر ذمہ دارانہ کارروائیوں کے فوری اور غیر مشروط خاتمے کا مطالبہ کیا۔
ترجمان کے مطابق پاکستان سعودی عرب کی خودمختاری، علاقائی سالمیت اور سلامتی کے لیے اپنی مکمل حمایت کا اعادہ کرتا ہے اور حرمین شریفین کے تحفظ سمیت سعودی شہریوں اور زائرین کی سلامتی کے لیے سعودی عرب کی کوششوں میں بھرپور ساتھ دینے کے عزم پر قائم ہے۔