وزیراعظم کے مشیر رانا ثناء اللہ نے کہا ہے کہ لانگ مارچ کو اسلام آباد کی حدود میں داخل ہونے کی اجازت نہیں دی جائے گی اور کسی بھی قسم کے انتشار سے قانون کے مطابق نمٹا جائے گا۔
رانا ثناء اللہ کے مطابق حکومت اور اپوزیشن کے درمیان فی الحال مذاکرات کا کوئی وقت طے نہیں ہوا، جبکہ مذاکرات میں اتفاق نہ ہونے کی بنیادی وجہ خیبرپختونخوا حکومت کی جانب سے دہشت گردی کے خلاف کارروائیوں میں سیکیورٹی فورسز کے ساتھ تعاون کی یقین دہانی نہ کرانا ہے۔
انہوں نے کہا کہ بانی پی ٹی آئی سے ملاقات اور علاج معالجے سے متعلق مطالبات نسبتاً ثانوی نوعیت کے تھے، اصل مسئلہ دہشت گردی کے خلاف تعاون کا ہے۔
وزیراعظم کے مشیر نے کہا کہ اگر خیبرپختونخوا حکومت دہشت گردی کے خلاف جنگ میں کردار ادا کرنے پر آمادہ ہو تو دوبارہ مذاکرات ہوسکتے ہیں۔