وزیراعلیٰ سندھ سید مراد علی شاہ نے کہا ہے کہ تھرکول فیز تھری منصوبے سے سالانہ کوئلے کی پیداوار 76 لاکھ ٹن سے بڑھ کر 1 کروڑ 12 لاکھ ٹن ہوجائے گی جبکہ تھر کے کوئلے سے بجلی کی مجموعی پیداوار 1,980 میگاواٹ تک پہنچ جائے گی۔
تھرکول فیز تھری کی افتتاحی تقریب سے خطاب کرتے ہوئے مراد علی شاہ نے تھر کے عوام اور منصوبے سے وابستہ کارکنوں کو خراجِ تحسین پیش کیا۔ انہوں نے کہا کہ تھر میں پہلے بنیادی سہولیات موجود نہیں تھیں، تاہم سندھ حکومت نے سڑکوں، ایئرپورٹ، سولر سسٹمز اور دیگر سہولیات کی فراہمی پر کام کیا ہے۔
وزیراعلیٰ سندھ نے کہا کہ تھرکول منصوبے کے سفر میں کئی اتار چڑھاؤ آئے تاہم پیپلز پارٹی کی حکومت نے 2008 میں منصوبے پر دوبارہ کام شروع کیا۔ ان کے مطابق فیز تھری منصوبہ 100 فیصد خود مالی اعانت سے مکمل کیا جا رہا ہے اور اس سے درآمدی ایندھن پر انحصار کم کرنے میں مدد ملے گی۔