پاکستان تحریکِ انصاف خیبر پختونخوا کے ترجمان شوکت یوسفزئی نے اپنے بیان میں کہا ہے کہ پی ٹی آئی کا لانگ مارچ کسی دباؤ کے تحت ختم نہیں ہوگا اور اسے ختم کرنے کی کنجی بانیِ پی ٹی آئی کے پاس ہے، جبکہ لانگ مارچ موخر کرنا محض ایک سیاسی حکمتِ عملی ہے۔
انہوں نے گورنر فیصل کریم کنڈی کی جانب سے چیف سیکریٹری اور آئی جی کو طلب کرنے پر سوال اٹھاتے ہوئے کہا کہ گورنر اپنے اختیارات سے تجاوز کر چکے ہیں اور 18 ویں ترمیم کے بعد ان کے پاس کوئی عملی اختیار نہیں بچا۔
شوکت یوسفزئی نے وزیرِ اعظم سے مطالبہ کیا کہ وہ صرف میڈیا پر مذاکرات کی باتیں کرنے کے بجائے اگر بااختیار ہیں تو اپوزیشن کے جائز مطالبات تسلیم کریں۔ انھوں نے مزید کہا کہ گورنر راج کی دھمکیاں دینے والوں کی اپنی کارکردگی صفر ہے۔
انہوں نے واضح کیا کہ بانیِ پی ٹی آئی سے ملاقات اور انہیں اسپتال منتقل کرنے کے مطالبات سے پی ٹی آئی پیچھے نہیں ہٹے گی اور وفاقی حکومت بانیِ پی ٹی آئی کی بہنوں سمیت تمام اسیر خواتین کو فوری رہا کرے اور ہائیکورٹ و سپریم کورٹ کے فیصلوں کا احترام کرے۔