خیبرپختونخوا میں عزمِ استحکام وژن کے تحت فتنہ الخوارج کے خلاف سیکیورٹی فورسز کی کارروائیاں جاری ہیں۔ شمالی وزیرستان کے علاقوں پلنگ زئی، ندیم کوٹ اور کوٹ خضری میں انٹیلی جنس بیسڈ آپریشن کے دوران 9 دہشتگرد ہلاک کردیے گئے۔
سیکیورٹی ذرائع کے مطابق ہلاک ہونے والوں میں فتنہ الخوارج کے 4 اہم دہشتگرد کمانڈرز خالد رضا، کامران، موسیٰ اور مفتو بھی شامل ہیں۔
کارروائی کے دوران ہلاک دہشتگردوں کے قبضے سے بھاری مقدار میں اسلحہ اور گولہ بارود بھی برآمد کیا گیا جبکہ عزمِ استحکام وژن کے تحت جاری آپریشنز میں فتنہ الخوارج کے متعدد ٹھکانے بھی تباہ کیے گئے۔
وزیراعظم شہباز شریف نے شمالی وزیرستان میں کامیاب کارروائی پر سیکیورٹی فورسز کے افسران اور اہلکاروں کو سراہا۔ وزیراعظم نے کہا کہ دہشتگردی کے خلاف کامیاب کارروائیاں ملک سے دہشتگردی کے مکمل خاتمے کے عزم کی عکاس ہیں۔
وزیراعظم کا کہنا تھا کہ سیکیورٹی فورسز کے افسران اور جوان دہشتگردی کے خاتمے اور ملک میں پائیدار امن کے قیام کے لیے قابلِ تحسین خدمات انجام دے رہے ہیں جبکہ دہشتگردوں کو ملک میں بدامنی پھیلانے اور اپنے عزائم میں کامیاب نہیں ہونے دیا جائے گا۔