لانگ مارچ میں مبینہ طور پر سرکاری وسائل کے استعمال کے خلاف درخواست پر پشاور ہائیکورٹ نے وزیراعلیٰ خیبر پختونخوا سہیل آفریدی کو نوٹس جاری کرتے ہوئے جواب طلب کرلیا۔
درخواست گزار کی جانب سے مؤقف اختیار کیا گیا ہے کہ وزیراعلیٰ خیبر پختونخوا سیاسی سرگرمیوں کے لیے سرکاری وسائل استعمال کر رہے ہیں اور لکی مروت لانگ مارچ میں شرکت کے لیے مبینہ طور پر سرکاری ہیلی کاپٹر استعمال کیا گیا۔
درخواست میں عدالت کو بتایا گیا کہ پشاور ہائیکورٹ نومبر 2025 میں اپنے فیصلے کے ذریعے سیاسی سرگرمیوں کے لیے سرکاری وسائل کے استعمال پر پابندی عائد کرچکی ہے۔
عدالت نے درخواست پر سماعت کرتے ہوئے وزیراعلیٰ خیبر پختونخوا سہیل آفریدی کو نوٹس جاری کردیا اور معاملے پر جواب طلب کرلیا۔