خیبرپختونخوا کے ضلع شمالی وزیرستان میں سیکیورٹی فورسز نے انٹیلی جنس بیسڈ آپریشن کے دوران فتنہ الخوارج کے 7 دہشت گردوں کو ہلاک کر دیا، کارروائی میں دہشت گردوں کے متعدد ٹھکانے بھی تباہ کر دیے گئے۔
سیکیورٹی ذرائع کے مطابق عزمِ استحکام وژن کے تحت جاری کارروائیوں میں ہلاک دہشت گردوں کے قبضے سے بھاری مقدار میں اسلحہ اور گولہ بارود برآمد کیا گیا۔ دہشت گردوں کے خلاف مؤثر کارروائیوں کا سلسلہ جاری ہے۔
صدر مملکت آصف علی زرداری، وزیراعظم شہباز شریف اور وفاقی وزیر داخلہ محسن نقوی نے شمالی وزیرستان میں کارروائی کے دوران 7 دہشت گردوں کی ہلاکت اور ان کے ٹھکانوں کی تباہی پر سیکیورٹی فورسز کو خراج تحسین پیش کیا ہے۔
صدر مملکت آصف علی زرداری نے کہا کہ دہشت گردوں کے غیر ملکی سرپرستوں اور سہولت کاروں کی سازشوں کو ہر قیمت پر ناکام بنایا جائے گا۔
وزیراعظم شہباز شریف نے کہا کہ ملک سے دہشت گردی کے مکمل خاتمے تک کارروائیاں جاری رہیں گی حکومت پاکستان کو دہشت گردی سے پاک کرنے کے لیے پُرعزم ہے۔
وفاقی وزیر داخلہ محسن نقوی نے کہا کہ فتنہ الخوارج کو کہیں بھی چھپنے کی جگہ نہیں ملے گی۔ پوری قوم دہشت گردی کے خاتمے کے لیے اپنی بہادر سیکیورٹی فورسز کے ساتھ کھڑی ہے۔